Oiso, des war ja so: mia samma losgfon am Namidog und dann hama gfon und gfon und gfon und de ganze Nocht lang, bei de Franzosen vorbei und bei de Russn und lustig wars de ganze Zeit. obwoi da Batman gschloffa hod. Do hama uns scho gfiacht, weil ma koan ghobt harn, der uns ghoiffa hod, wenns brenzlig woan is. Da Reinhard, da Hänsele, hod uns aba glei a Flaschal Wein ausgem, zur Beruhigung sozusagen.Und dann war ma aufamoi do. middn in da großn Stod und hama uns a Liadi einizogn:

Barcelona! (Da Harald hods dabeighobt).

In unsam Hotel hama uns glei gmiadlich eigricht und hama gschaud. wos oiß gibt: An Klima, der nua gäd, wenn ma duscht oda's Fenster aufmacht und a boa Untahosn im Hof ois Reserve hat. Wie ma glei aso neigierig warn, sama a glei zum Hafn oigroast. Fisch hama koi gsegn, aba dafia an Hauffa Dreg und Schiffal. Do hama glei aso an Hunga griagd, daß ma uns aufd Brotzeid auf d'Nocht moads gfreid ham. Hama a glei a Übaraschung dalebt. De Kellna ham Spanisch gred! Aba Godseidank war da Batman wieda fit und hod se glei sauba untahoidn. (Kellner frogt, wos a zum Dringa mecht: "Wos hosdn do?" (Kellner bringt Cola): "Na, mersse!". Für de arma Schlucka unta uns hods a Chlorwossa gern... wia im Schwimmbad z'Pfarrkiacha hods gschmeckt.

Glei wia da Mong voi war, wars zum Fuadgeh. Und des sauba. Des hama de ganze Woch so durchzogn. Mia war ma zum Beispiel am Placa Catalunia und do hama gsunga und a boa Amis droffa, mid dene ma gleich guad Freind woan han. Manchmoi war ma a woandas und sunstwo und an Sangria hods überoi gem und mia hama eigentlich fast nia selber zoin miassn, und dabei is ganz schee wos wegganga (Gracias Reinhard, Harald und Margit!!).

Ah ja, am Dog hamaja a wos gmacht. Des Fuaßboistadion - so groß - da dodale Wahnsinn. A griabege Schiffalfahrt und a gfährliche Seilbahnfahrt hama genauso guad übastandn wia de Museen (wo se da Harald subba auskennt hod) und de Haisa vom Gaudi (ja, so hoaßt der wiaklich). Mei, und des alla-alla-allabeste war ja as Wandan und Sonnen am Cabo de Creus, wo ma a fremdliche Krake kenagleand ham (gäi, Anne!). Im Hotel hama a imma an Spaß ghobt, weil de Bettn ned imma ganz so stabil warn. Oamoi in da Nocht hod ebba so laud gschrian, daß da Batman am Namidog glei kemma is und oißi wieda hergricht hod (Badman, dangschee!). A boa so Hansln hams natürlich ned lossn kina, middn in da Nocht den hoteleigenen Aufzug auszumbrobieren. Oana vo dene hod einfach auf olle Gnepf druckt und da Aufzug is auf olle Stockwerk stehblimm, wo da D. a sechane Gaudi gmacht hod, daß d' I. glei gschimpft hod. Am ledsdn Abnd dann samma zum Pueblo Espanol ganga, wo mas nomoi so richtig gscheid gracha lossn ham. Sogar de hartgesottenen Anti-Alkoholiker ham bruddal einegliddad (hineingelitert). Mim Taxi sama zruggfon und da Taxifahrer, der Hund, der hod an Harald sauba bschissn. Am nägsdn Dog hamma leida scho wieda hoamgfon midm Bus üba d'Schweiz und üba Frankreich und olle war ma voi " debbrimiert", weils so schnäi vorbei war und weil ma wieda in d'Schui miassn. In da Schweiz war ma am Schbuiblods, do hama uns an de "Drah-di-dabbad-und-schbeib-Stangal" aneghängt. Im Bus wars dann am Batman ganz schlecht. Für uns Schüler hods nomoi an Wein gem, zum Abschluß sozusagen.

Und dann war ma a scho wieda dahoam.

Bruddal wäidglasse wars!

Hasta luego! Arriba! Abajo! Al centro y a dentro!!!

Kroni  Hannes  Dominik  Risl  Kerstin